Türkmenbaşy Halkara deňiz porty Türkmenistanyň ulag üpjünçilik ulgamlarynda iri merkezleriň biri bolup durýar.  Portuň iň esasy terminallarynyň biri hem Konteýner terminalydyr. Häzirki zaman ulag we logistika ulgamynda amatlylygy we mümkinçilikleri taýdan giňden ulanylýan konteýnerler Türkmenbaşy Halkara deňiz portunda awtomobil we demir ýollary arkaly hem daşalýar. Portuň amatly ýerde ýerleşmegi netijesinde konteýner terminaly Aziýa sebitinde konteýner daşamalaryna uly itergi berýär. Hytaýyň iri önümçilik meýdançalaryndan harytlary konteýnerlere ýükläp, halkara geçelgeleri arkaly Gruziýanyň, Türkiýe Respublikasynyň, Russiýa Federasiýasynyň üsti bilen Ýewropa daşamak üçin Türkmenbaşy Halkara deňiz porty iň amatly we gysga ugurlaryň biri bolup durýar.